Россе Ӏилманхо Кузнецова Ирена ена хилар гӀалгӀай студенташ болча
30.09.2023 18:58
Российски Ӏилман академе профессор, физико-математически Ӏилмай доктор Кузнецова Ирена ена хилар, ГӀалгӀай паччахьалкхен университете болх беш бола хьехархой, дешаш бола кагирхой болча. Кхетаче дӀахьош яр, дешара тӀаерзаяь, Российски «ХIама довзар» («Знание») яхача юкъарлонна балхаца ювзаенна. Россе кховзткъа регионе ешаш йолча лекце хьагойт лоархӀаме, таханарча хано дӀадеххача беса дола декхараш, цо таро хулийт Даьхен Ӏилма дикагӀа довзийта.
«Кузнецова Иренас дийцар цу темах: «Таханарча дунен тӀара сенсораш: тахкар, хьакхоллар», иштта дийцар сенсораш хьакхоллара исторех лаьца, уж хьаяра балха даькъ тӀарча хьалах, шийна карагIдаьннарех. Лекци бахьан долаш ИнгГУ студенташта дукхагӀа дайзар итт шера керттера лоархӀаш хьадоагIача Ӏилмах, иштта яйзар, 2022 шера денз 2031 шерга кхаччалца йола Россе президента Путин Владимира амарах дӀайолаяь технологеш. Студенташта иштта яйзар цу итт шера чуйоагӀаш йола Ӏилман даькъ тӀа къахьегара таронаш», - аьлар «Сердало» газетага ГӀалгӀайчен паччахьалкхен университете.
Из лекци яьнначул тӀехьагӀа, гӀалгӀайчен студентий таро хилар шоай хаттараш дала, иштта тахан Россе тохкамхошта хьалхашка латтача балха хьакъехьа довза.
