Кагирхой ЦӀен кулгалхо Россе семинаре дакъа лоацаш ва
Республикерча кагирхой кхетачений ЦӀен кулгал деча Ведажанаькъан Зоврбика вай мохк бовзийт РФ моттигашка кагирхой политика йоаржаярах йола программаш вӀашагӀйохкача, кагирхой политикаца эшараш доаржадеча Ерригача Россе семинаре. Из хоам «Сердалога» бир цу оагӀонцарча моттига болхлоша.
«Тахан ураотташ латтача тӀехьен оагӀув хьаллаца, гӀо де эшаш дараш, беркате хургйола проекташ яйзар цу лоархӀамеча кхетаче. Федеральни, моттигерча оагӀонашка гӀолла дӀахьоча кагирхой политикага хьежжа хургда кагирхошта лаьрхӀа доаржадеш дола кердадараш.
Из хӀама да тахан геттара лоархӀамедар. ДӀахо дӀахьош бола болх мишта хила беза довзийтар тхона цу кхетачено. Укх шера оахош чулуш дола дехар аьттув болаш, тӀехдика хиларга догдоах оаха. Ма могга къахьегаш, вай кагирхошта аьттув мел бар де хьожаргда тхо!» - белгалдир Ведажанаькъан Зоврбика.
