Дешареи гIишлошъяреи министраш ишколаш мишта тоаяьй хьежар
Дешареи Iилмани гIулакхех йолча министерствон кулгалхо вола Цхьорой Ахьмад-Башир; гIишлошъяра балхех йолча министерствонна хьалхалатта Иленаькъан Муса арабаьлар; ишколаш меттайоалаеш бола боккха болх малагIча боараме ба тахка. Долакха-Юртарча № 2 йолча ишколе-берий беша, Наьсарерча № 9, № 10 йолча ишколашка, Илдарха-ГIалий тIарча «Малышок» яхача берий беша бахар уж.
«Боккха болх ба цу моттигашка чакхбаьккхар, гIишлой куц хувцаш, чура пенаш хьоахаш, керда тховнаш тухкаш, кIалхарча ларда кхера тохаш, кораш-наIараш хувцаш, ингале Iоакъа тохаш. Деррига тока саьргаш хийцад, керда видеогойтам оттабаьб, хоза лампаш йогIаш сийрдаяьхай еррига моттигаш», - дийцар тха газетага дешареи Iилмани гIулакхех йолча министерстве.
Дешара моттигаш боаггIача боараме тоаяр, эггара керттерча гIулакхех да тахан. Деррига балхаш мишта кхоачашдаьд хьежар хьакимаш.
