Гӏалгӏайчен паччахьалкхен совгӏаташ делар Федеральни казначейства кулгалхошта
Лоархӏаме кхетаче дӏахьош хилар вай мехкада Келаматанаькъан Махьмуд-ӏаьла, Федеральни казначейства хьалха латтача Артюхин Романаца. Из хоам «Сердалога» бир мехкадаь зарбан болх лелабераша.
Кхетаче дакъа лоацаш вар РФ Федеральни Гуллама Федераце Кхела доакъашхо вола Илезанаькъан Михаил, Федеральни казначейства кулгалхочун гӏончаш.
«Мехка лаьрхӏа ахча къоастадарах, иштта кхыдолча лоархӏамедарех дийцар цу кхетаче. Къаьстта терко йир республикера ахча дӏа-хьа хьожадара, хӏама боаггӏача боараме, пайда хургболча тайпара дӏадахийтара, иштта кхыдолча цу оагӏонца дувзаденнарашта», - йоах тхога бенача хоамо.
Гӏалгӏай Республикан совгӏаташ делар цу кхетаче вай мехкадас Келаматанаькъан Махьмуд-ӏаьлас Федеральни казначейства хьалха латтарашта. Вай мехкара вахара-экономически хьал тоадара, массахана беркате бувзам лоаттабара тӏехьа къахьегарах, доккха баркал аьлар царна Мехкадас.
Лоархӏаме совгӏаташ делар Федеральни казначейства кулгалхо волча Артюхин Романа, цун хьалхара гӏонча волча Исаев Элина, иштта кхыболча гӏончашта: Демидов Александра, Михайлик Александра, Суконкин Александра.
Цу гӏулакхо хьагойт, вай мехкара ахчанцара болх федеральни оагӏонца бувзам лоаттабеш дӏакхахьар тахан вайна лоархӏаме долга.
