Эрсий театро «Бӏаьшерий боадонгара» яха спектакль шозза гойтаргья Наьсаре
Укх бетта ГӏалгӀай Республикан эрсий паччахьалкхен ашарий-драматически театро Наьсаре шозза гойтаргья «БӀаьшерий боадонгара» яха Базорканаькъан Идриса романах оттаяь спектакль, аьлар ГӏалгӀай Республикан РГМДТ зарбан болх лелабеча Султиганаькъан Ӏарбе.
«Кӏимарса бетта 17-ча, 28-ча деношка массанена езаенна йола Поглазов Владимира постановка, Петр Глебович Попова инсценировка республикан бахархой дег чу южаш хургья. Наьха таро хургья цӀенача безама, чӀир лехача пхьена, нийсхон, иштта шоашта дезар моллагӀча наькъ тӀа даккха безам хилара моттигаш го», - аьлар хоамо.
Къаьстта теркам тӀаоз йовхьамаш ловзаераша беча балха, цар хьагойт къаман культура йоаржаяра тӀехьа шоаш къахьегаш хилар.
Тхога хоам баьчо яхачох, спектакль дӀайолалу сайрийна 17 сахьат даьлча.
