Гӏалгӏайчен эрсий театро А.Н. Островске комедега хьажа бех
Наджгоанцхой бетта 30-ча дийнахьа, Гӏалгӏайчен паччахьалкхен ашарий- драматически эрсий театро бахархой бех, А.Н. Островске «Къе хилар айп дац» яхача классически беламга хьажа. Из пьеса язъяьй ХӏХ бӏаьшере, массаза санна езаш я укх заман наха. Цу тӏа говзалца дувц безамах, дезалерча мах барех. Островске гойт кӏаьдача безамца, кӏоаргача психологеца, дег чура йола дикал материальни кхоачама кӏийле хилар. Цунга хьожачар таро хургья йовхьамаш ловзаерий болх мишта вӏашагӏбеллаб ха, цар балха гӏирсаш довза, сцена тӏа хьакхеллача къаьнарча вӏаьхийча сага цӏагӏара хьал го.
«Лоархӏаме да - спектакль дӏахьоргья «Бига хьай даьй музее, театре, концертий зале» яхача Ерригроссийски болама чуйоагӏаш. Цо таро лу дезал болча фусамашта культуран хьалаш довза, цига дакъа лоацаш хила, театр дукхача нахага дӏакхоачаш хилийта, цу юкъе вай кхувш йоагӏа тӏехье яккха. А.Н. Островске белам - геттара дика ба дезал цхьана хьожаш хилча, цо гулбеннарашта лургба сакъердам, кӏоаргга уйла яр», - аьлар «Сердало» газетага Гӏалгӏайчен эрсий театре.
Театра тоабо бех кагирхой, цар даьй-ноаной цхьана сакъердаме сайре дӏаяхьа, кӏоарга къамаьлаш хаза, дийна оамалаш го.
