Из болх баь хиларо таро хилийтар 7,2 эзар балха моттиг хьакхолла, ишколашка а иштта берий бешамашка а.

«Таханарча заман ишкол» яхача программа, «Дешар» яхача къаман проекта чудоагӀаш; хьалъяьй итт юкъарча дешара 6 эзар дешара моттиг йола гӀишлош, иштта хьалъяьй «Нах баха цӀенош, керттера гӀишлош сейсмически оагӀорахьа кхаленашка чӀоагӀа хилийтара» яхача программанна чуйоагӀаш 320 моттиг йола цхьа гӀишло.

Хьалъяьй 12 берий беш,1530 моттиг йолаш, уж болх бе йолалургья 2024 шера тов бетта 1-ча дийнахьа», - аьлар ГӀалгӀайчен премьер-министра В. Сластенина, ГӀалгӀай Республикан Парламентага министрий кабинета баь болх бувцаш.

Цо иштта белгалдир ткъаь итт ишкол цӀенхаштта  тоаяь, цу даькъ тӀа латта декхараш а кхоачашдаь хилар. ГӀалгӀай Республикан Паччахьалкхен кулгалхочо ше къамаьл деш белгалдир, «Дешар» яха проект кхоачашъеш, дешара центраш хьакхоллаш, физически культура, спорт чулоацаш йола занятеш еш, терроризма духьала къовсам лоаттабеш, цӀи ялара кхерамзлен Ӏалашо яра йола моттигаш хьаеш, ахкан замах бераша салоӀача хана, царна мах боацаш даар лоаттадеш хила дезилга.

Цу юкъе дар гӀалгӀай мотт Ӏомабе безаш хилар, паччахьалкхен экзамен дӀаялара хьал тоаде дезаш хилар, дешархой профессиональни оагӀув лахар.