Шу доладелча денз, 382 керда дезал хьахиннаб вай мехка
2024-гӀа шу доладелча денз, 382 керда дезал ӀотӀакхийттаб вай мехка, республике малхадаьннад 3 232 бер. Из хоам «Сердалога» бир Мехкадаь зарбан болх лелабераша.
«Керда дезал вӀашагӀкхеташ, хӀара шера адам дебаш дола беркате гӀулакх вай мехка хьаллоацаш хилар хьагойт цу оагӀоно.
Теркалде деза, вай боккхача мехка президент Путин Владимир дезалцара лоархӀамедараш, цар хьал ма хулла тоалургдараш деш, цу наькъ тӀа къахьегаш волга», - белгалдир вай Мехкадас Келаматанаькъан Махьмуд-Ӏаьлас, цу керттерча гӀулакхах дувцаш.
Наьсарен кхаленца, Наьсарен-Шахьарца дувзаденнараш хьоахадир Мехкадас, раьза волаш. Цига малхадаьннад 1193 бер, 151 керда дезал хьахиннаб. Цу беркатеча наькъ тӀа шоллагӀча моттиге отт МагӀалбик, кхоалагӀча моттиге - Шолжа-Шахьар.
Вай къаман юкъе, тхьовра денз, чӀоагӀа лоархӀаме хиннад, дезал ма хулла боккхагӀа хилар, цунна юкъера Ӏадаташ, барт-безам хургбараш.
