Самара бахархоша дагалаьцар, Россе Турпалхо Келаматанаькъан Ӏалихан
Россе Турпалхочун Келаматанаькъан Ӏалихана цӀи лелаеча Самарерча майдан тӀа укх деношка дукха адам дар. ХӀанз санна болча тов бетта 2007 шера 17-ча дийнахьа, Россе ФСБ терроризмаца къовсам лоаттабара, конституце бокъонаш лораяра болча хьем боаццача тохкама болхло Келаматанаькъан Ӏалихан ший балха декхараш кхоачашдеш велар. Из ди дагалаьца, цун сий де, из дагавоха укхаза баьхкабар цунца болх беш хиннараш, иштта бахархой, из вовзаш хинна нах.
«ГӀалгӀайчен вахархочунна карагӀдаьнначун сийна улг оттадаьд майдан тӀа, цига хӀара шера из дагавохаш зизаш дехк наха.
Иштта зизаш даьхкар укх шера Самарерча мемориала улга тӀа, цига деша ваьгӀав Келаматанаькъан Ӏалихан, цунца хетта кхетаче дӀайихьар гулбеннача наха. 2021 шера хьайийллача Самарски областе гӀолла йолча УФСБ гӀишлон хьалхашка а даьхкар зизаш. Цу мемориала тӀа я турпалхой-чекистий цӀераш, уж ба цу мехка болх баь нах, царна юкъе я Советски Союза турпалхочун Лезин Вениамина, Маневич Лева, иштта Келаматанаькъан Ӏалихана цӀераш. Самарерча лаьттанна дагайоагӀа ший турпалхой цӀераш, иштта уж сий деш лоархӀаш а я», - аьлар «Сердало» газетага ГӀалгӀай Паччахьалкхен зарбан болх лелабераша.
Келаматанаькъан Макшарипа Ӏалихан Къилбаседа Кавказе аргӀанарча командировке венача хана велар. Из чувагӀаш хиннача машина герз дийттар. Террористаша даьча зуламах 15-зза герз кхийтта човнаш яьяр цунна, цун машина 130 пхо чакхбаьнна моттигаш яр.
Турпалал, денал гойтарах, Россе кхерамзле лораеш доккха дакъа юкъедихьа хиларах, Российски Федераце Турпал аьнна цӀи елар Келаматанаькъан Ӏалихана. Мехка Президента Путина цу хьакъехьара Амар арадаьлар 2007 шера лайчилла бетта 4-ча дийнахьа.
