ГӀалгӀайчен боксёраш дикача кийчо яь ба
ГӀалгӀай Республикан боксах йола гулъяь тоаба вӀашагӀъеллай дикагӀа болча спортсменех, къовсам чакхбаллалца лата могараш юкъе а боалабеш. Укх деношка, вай мехкахоша шоай латара говзал хьагойтар Ставропольски края Суворовски станице дӀахьош хиннача Къилбаседа Кавказа федеральни даькъ тӀарча Хьалхалене, яхаш, дийцар «Сердало» газетага ГӀалгӀай Республикан бокса Федераце.
«Яхьашка ГӀалгӀайчен спортсменаша 7 майдилг яьккхар. Джанхотанаькъан Элберд 60 кг дозал дарашта юкъе котваьлар. Иштта коталон хьалхарча мугӀаре ва Налганаькъан Мухьмад 52 кг дозал долаш», - аьлар хоамо.
ЦӀечой Абумуслима дото совгӀат даьккхар, 63 кг дозал долаш. Борза совгӀат даьккхар Ноакастхой Ислама (54 кг), Аькхенаькъан Ӏаддал-Малика (46 кг), Хучбаранаькъан Абукара (63 кг), Галай Адама (+80 кг).
Бераш Ӏомалуш да Дарсиганаькъан Абой, Баьзенаькъан Мухьмада, Малсаганаькъан Гирихана, Пхьогоранаькъан Мухьмада, Булгучанаькъан Тимура, Оздой Аслана кулгалца.
Белгалду, котбаьннараш бокъо йолаш ба Россе хьалхале яккхара яхьашка дакъа лаца.
