«Эльбруса Кубке» 8 майдилг яьккхар вай тхэквондисташа
11.12.2024 10:04
ГӀаьбартой-Балкхарой мехка дӀайихьача тхэквондох йолча ерригача Россе яхьашкара, 8 майдилг яхьаш, цӀакхаьчар вай спортсменаш. Из хоам «Сердало» газетага бир спорта гӀулакхех йолча Министерствос.
«Нальчике дӀайихьача яхьашка дакъа лоацаш хилар Россе 22 моттигера 1000 совгӀа спортсмен. Цига белгалбаьлар вай мехкара Боканаькъан Асхьаб (37 кг), МутаӀаланаькъан Ӏаддал-Малик (33 кг). Борза майдилгаш яьхар Къамурзой Ӏийсас (61 кг), Тимарзанаькъан Дамира (33 кг)», - йоах тхога бенача хоамо. ЗӀамагӀа болча спортсменашта юкъе котало яьккхар Тебой Азамата (28 кг). Дото майдилгаш луш белгалбир МутаӀаланаькъан Мухьаммад (32 кг), Къамурзой Басир (28 кг), Мержой Ӏаддал-Малик (41 кг).
