ГӏалгӀайчен вӀашагӀтеха тоаба - «Россе тхэквондо цхьанкхетара президента Кубок» яккхара доакъашхо.
ГӏалгӀайчен вӀашагӀтехача тоабо дакъа лаьцар «Россе тхэквондо цхьанкхетара президента Кубке», из дӀайихьар Къарший-Черсий Республике, яхаш, хоам бу ГӏалгӀайчен спорта Министерствос.
«Черкесск-Шахьара йоккхача спортивни майдан тӀа Российски Федераце 25 моттигера 280 гаргга кӀаьнкаши йиӀигаши гулбелар. Вай мехкахоша лакхара совгӀаташ даьхар, шоай дика кийчо дӀагойтарах. Лакхара совгӀаташ даьхарех ба МутаӀаланаькъан Мухьаммад (30 кг), Мержой Ӏаддал-Малик (44 кг), Овшанаькъан Мухьаммад-Амин (57 кг). Тебой Азамата (30 кг), Хидиранаькъан Абубакара (57 кг), кӀеззига кхоачамбоацараш нийсдалийтар шоай къовсамаюкъе, цар яхьаш чакхъяьлар дото совгӀаташ доахаш», - аьлар хоамо.
Тхоца къамаьл даьчо яхачох, Къарший-Черсий мехка дӀайихьача яхьашка, шоаш тхэквондиста даькъ тӀа дикагӀчарех хилар гойтар 12-14 шу даьннараша.
