Латарах долча VӀӀ Евразийски ловзарашка дакъа лоацаш хилар вай спортсменаш
22.05.2025 09:33
Россе ерригача моттигашкара, СНГ мехкашкара спортсменаш гулбаьча каратэх долча VӀӀ Евразийски ловзарашка дакъа лоацаш хилар вай мехкара тоаба. Из хоам «Сердалога» бир спорта гӀулакхех йолча министерствос.
«100 совгӀа каратист вар укх бетта 15-ча денгара 19-ча денга кхоачаш, Уфе латаш хиннар. Пхиъ дошо, шиъ дото майдилгаш яьхар цига вай каратисташа. Лакхерча лагӀа тӀа баьлар ТӀомбинаькъан Адам (68 кг), МутаӀаланаькъан Мухьаммад (40 кг), ТӀомбенаькъан Мухьаммад( 51 кг), хӀаьта Пхьарчанаькъан Рахьима дошо ши майдилг яьккхар, шин оагӀонца лета. Кхорахойнаькъан Мухьмад-Ӏаьла (48 кг), ЦӀечой Билал (39 кг) шоллагӀча лагӀа тӀа баьлар», - дийцар тха газетага.
«Килар» яхача спорта клубе Къоастой Джабраила Ӏомабеш ба уж спортсменаш.
