ГӀалгӀайчен вӀашагӀтеха тоаба WRPF пауэрлифтингах йолча дунен чемпионата доакъашхо яр
WRPF (лаьрххӀача гӀирсех пайда ца эцача) пауэрлифтинга къаьсттача даькъах йолча дунен Чемпионатера майдилгаш ера ГӀалгӀайчен спортсменаша, цу яхьашка кот а боалаш, яхаш, дийцар «Сердало» газетага ГӀалгӀай Республикан спорта Министерствон зарбан болх лелабераша.
«Массехк дийнахьа Москве дӀахьош хиннача яхьашка дакъа лоацаш хилар 4000 спортсмен, уж баьхкабар дунен 30 мехкара, иштта Россе 80 моттигера. ГӀалгӀайчера цига дакъа лоацаш хилар тренера Котанаькъан Хьамзата кхебу кагирхой. Цу тайпара, начӀал долча спортсмена Дошхьакълой Рахьмана котало яьккхар йийллача категорех. Лаьнанаькъан Амира «дотув» дера. Янданаькъан Саварбика лакхара моттиг яккхарал совгӀа, дунен толам баьккхар 60-69 шу даьннача спортсменашта юкъе», - аьлар тхоца къамаьл даьчо.
