РФ Хьалхарча турпала Осканаькъан Сулумбика хетабаь гойтам хьабелларгба тахан ИГМК
«Осканаькъан Сулумбик - Россе Турпал» яха гойтам хьабелларгба тахан гIалгIай паччахьалкхен музее. Укх бетта 14-ча денга кхаччалца турпала вахарца дувзаденнараш довза аьттув хургба бахархой. Тема авиацен инерал-майор хинна Осканаькъан Сулумбик вайцара къаьста 33 шу дизара хетабаьб гойтам.
Сурташ, из вувцаш дола книжкаш, статьяш, цун хинна хIамаш гургья музее турпала никъ бовза баьхкарашта. Из доккха хатар хилар 1992-ча шера саькура бетта 7-ча дийнахьа. Липецкерча тIема кийчон моттига кулгал деш хинна вай мехкахо чуваьгIа фецара кема ший болх дIа ца хьош дисар, ший кIалхарвала аьттув боллашехь, фецара кема нах бахача моттига IотIа ца дожийта, дIаховахав деналах визза хинна къаман воI.
Цу хана денз, саькура бетта 7-ча дийнахьа Липецке, вай мехка дукха кхетаченаш дIакхухь Осканаькъан Сулумбик дагалаьца.
