Психически могашалах йола моттиг хьайийллар вай мехка
Илдарха-ГӀалий тӀарча дарбанче ментальни могашалах йола моттиг хьайийллар. Цига дакъа лоацаш бар унахцӀенон гӀулакхех йолча министерствон хьалха латта Ӏалбаканаькъан Зара, шахьара администрацера хьакимаш, Юкъарча палатан доакъашхой, иштта кхыбола хьаьший. «Сердалога» из хоам бир цу оагӀонцарча министерстве. Психологически, психиатрически оагӀонцара гӀо дара тӀехьа вӀашагӀъеллай из моттиг, къаьста чӀоагӀа из гӀо эшарех ба СВО доакъашхой, цар дезалаш.
«Таханарча хана из моттиг хилар вайна массанена чӀоагӀа лоархӀаме да. Халача хьале эттача, боккха бала текхача наха боаггӀача боарамера психологически гӀо эш. Даьхе лораеш латтарий, цар цӀагӀарча наьха оагӀув хьаллоацаш, массахана уллув, эшаш дола новкъостал деш хила деза вай.
Цу гӀулакха лаьрхӀа кийчбаь болхлой ба тха, халчаэттача, цӀагӀара саг дӀаваьнна гӀайгӀано вӀашкабихьарашта новкъостал деш», - белгалдир министра, ший къамаьла юкъе. УнахцӀенон министерствос яхачох, кердача моттиге болх беш хургба лораш-психиатраш, психотерапевташ, лораш-психологаш, вахара оагӀонцара болхлой. Психиканна Ӏоткъам хиннарашта, тӀема аренашка хало лайнарашта гӀо дергдолаш, лаьрххӀа кийчбаь ба уж болхлой.
«Дарбанчера арабаьнна цӀабахача дӀахо а гӀо дергдолаш, терко лоаттаергйолаш, кийчяь я из моттиг. Къаьста йоккха терко лоаттаергья цига бӀухой дега хьал меттаоттадара, иштта цар цагӀарча наьха хьал аттачахьа даккхара.
Цу моттига дӀахьоргдолча декхарашта юкъе керттерчарех да бахархошта мах боацаш психологически, психотерапевтически оагӀонцара гӀо лоаттадар, тӀема доакъашхой, цар дезалий хьал меттаоттадар, геттара чӀоагӀа гӀайгӀанга баха, метта ца боагӀача наха новкъостал дар, дег чура кхерам дӀа ца боаларий хьал меттаоттадар, иштта кагирхошца, кхувш латтача берашца нийсача новкъа доахаш болх бар, могаш боацарий цӀагӀарча нахаца цхьацца хӀамаш царна хьалхадоахаш, уж Ӏомабеш кхетаче дӀаяхьар, цхьа доккхача хатара юкъе човхам хиннача нахаца болх бар», - дийцар тха газетага унахцӀенон гӀулакхех йолча Министерстве.
