КӀиран юкъерча эггара дезагӀа долча денца, вӀаший даькъалабувц бахархоша тахан
Тахан кӀиран юкъера эггара дезагӀа дола ди да яхача хоамо бусалба наьха дегашта цхьа ший тайпара йӀовхал, безам лу.
«КӀиранна чудоагӀача деношта юкъе, эггара лоархӀамегӀа дола ди лаьрхӀад пӀаьраска денах. ХозагӀа дола барзкъа тӀадийхе, безаме хьаж йоагӀа миска техе, рузбан баха кийчлуш хул бахархой цу дийнахьа. Даьла Элчас (Даьлера салам, моаршал хилда цунна), малх хьалкхеташ долча деношта юкъе, эггара дикагӀдар пӀаьраска ди да аьннад», - белгалду дийшача наха.
ХӀара юрта, шахьаре доахкача маьждигашкара хьахозаш хул имамо бу хоза хьехам, геттара дукха дуӀаш де Ӏемад вай къаьстта цу дийнахьа, дегаш тийша хул АллахӀа жоп лургхиларах.
ВӀаший салам доаржадеш, никъ бизза маьждигашка дӀаболхаш, чубоагӀаш болча бусалба наха дега тоам бу; хоастам ба-кх АллахӀа, со бусалба кхолларах, аьле хеталу. Кхеллачо дӀаэцалда вай беркате дуӀаш!
