Наьсарен кхален ворхӀ футбольни тоаба яхьеяьлар котало яккха
Наьсарен кхален, Магас- Шахьара берий-ондаргий ворхӀ тоаба яхьеяьлар зӀамигача футболах, из хетаяь яр терроризмаца къовсам лоаттабеча Денна, аьлар «Сердало» газетага, Магас шахьара культуран, спорта, туризма Центра кулгалхочо Янданаькъан Абте.
«Яхьаш дӀаяхьара гӀулакхага хьожаш я шахьара мэрена чуйоагӀаш йола, терроризма духьала къовсам лоаттабара болх лелабеш йола комисси, шахьара мэре новкъостал а деш, из хьаллаьцар начӀал долча спортсменаша. Яхьаш дӀайихьар физкультурно-унахцӀенон комплекса даькъ тӀа Приставкина урамах. Духьалъотташ йола яхьаш дӀайихьачул тӀехьагӀа, «Аьрзи» (Наьсаре) яхача тоабо котало йихьар. ШоллагӀча моттиге хилар «Дошлакъий-Юртара» спортсменаш. КхоалагӀа моттиг дӀачӀоагӀйир Динамо Ӏ (Магас), хӀаьта йиълагӀа моттиг яьккхар Динамо ӀӀ (Магас)», – аьлар хоамо.
Цул совгӀа, шахьара кулгалхочо Тиймарзанаькъан Мусас совгӀаташ делар Ховтанаькъан, Арцханаькъан, Маценаькъан кхаь футболиста; «ДикагӀа вола нападающи», «ДикагӀа вола вратарь», иштта «ДикагӀа вола защитник» яхача доакъошка.
