Илдарха-Гӏалан бӀухой дезалашта, Ӏаьдало новкъостал лоаттаду
ЛаьрххӀача тӀема операце бӀухой дезалашта, новкъостал лоаттаду моттигерча администраце. Нах тӀаэцача хана, кхоъ дехар дера бӀухой гаргарча нахагара, яхаш, дийцар «Сердало» газетага «Даьхен лорабой» ганза кулгалхочун гӀончас Джанхотанаькъан Мадинас.
Хьалхара тӀаийцар доал деча даькъ тӀарча Ӏаьдало, веннача тӀема бӀухочун Дахкилганаькъан Руслана фусам-нана Джимханова Лейла, цо дийхар ший бераш интернате оттадар, хӀана аьлча ше хӀанз укх сахьате уж хьалкхебе могаш яц.
Хӏанз тӀем тӀа латтача лаьрххӀача операце бӀухочун нана Ч. Райшата дехар дувзаденна дар материальни новкъостал дарца, иштта вахарера цхьацца хаттараш кхоачашдарца.
Цул совгӀа, нах тӀаэцача яр СВО доакъашхочун йиша Хеди М. Цун езаш хиннар яр дезал мел ба тӀадола справка.
Дерригача хаттарашта дика жоп делар. Шахьара бахархой раьза хилар шоаш хьаллацарах.
