Щеглов: Кинон меттаца наха юкъе дика доаржадар
«Сердало» газета интервью луш, «Триикс Медиа» яхача кино доаккхача оагӀон продюсер волча Щеглов Сергейс белгалдир, шоай керттера декхар, кинон меттаца наха юкъе дика доаржадар долга.
«ШоллагӀа шу да «Спецназ» яха кино оаха ГӀалгӀай мехка доаккха. Гуйран хана, шоллагӀча бетта бӀаргагургба хьажархошта тха таханара болх. Укх мехкарчарна тара хозленаш атта кораергьяц, цудухьа кхаьчад тхо укхаза юха. Гонахьара Ӏалам, наьха вахара хьал, культура - деррига а наха дезалургдолча тайпара да», - дийцар продюсера.
Цо теркалдаьчох, Росси тахан туризмацара гӀулакхаш ма хулла тоадеш я, хӀаьта «Триикс Медиа» яхача кино доаккхача оагӀон мехкадаьцара Келаматанаькъан Махьмуд-Ӏаьлацара декхар - ГӀалгӀай мохк дукха туристаш тӀалатташ моттиг хилийтар да.
«Тамашийна хоза я шун моттигаш, из дерригача кинога гӀолла дӀагойта деза. Керда гостиницаш, культуран моттигаш, болх бе моттигаш Ӏалашъяра гӀулакхе лоархӀаме гӀа баккхар да из. Кинокластер хьаелла безам болаш да тхо укхаза - кино даккхара оагӀонцара массехк моттиг хургья уж», - белгалдир цо.
