Гулбеннача дешархошта дийцар, наркотик яхача дохьажо толхадеча вахарах, цо доадеча кагирхой иразах. «Таханарча дийнахьа, из бIеха гIулакх геттара даьржад вайна юкъе.

Къонабарий вахар хIалакдеш латт цу дохьажо, дукха ба цо боабаьраш. Цу унзарча хIаманна духьала къовсам лоаттабе беза вай массане. Вай дерригаш оарцагIдала дезаш, доккха во да наркотик! Кхувш латтарашца массахана кхетаченаш дIакхахьа еза, из дош дувцаш. Цу зулама никъ хоадабе беза вайна юкъера», - культуран цIен болхло йолча Хамхой Iашата ма дарра дийцар берашта цу хьакъехьа. Цкъа цу наькъ тIа ваьнна, ший вахар толхадаьча сага хала хургда, хьалха мо тешаме саг хинна, наха юкъе дIаотта.