Довнаш дӏадоахаш, беча балхо дика лар ютилга гуш да мехка
Мехкадаь тӏахьожамца, наха юкъера довнаш дӏадаха оттаяьча комиссе бӏарчча шера дӏабихьача балхах, 40 дов дӏадаккха аьттув баьлар мехка. Белгалде деза, царна юкъера ялх моттиг юкъе пхьенаш хьаьрча хиннилга. «Сердалога» из хоам бир мехкадаь зарбан болх лелабераша.
«Цхьацца бахьанашта тӏагӏолла вай мехкахошта юкъе нийсденна довнаш дӏадаха гӏерташ; дийшача наха, къоаноша, юкъарлон оагӏонцарча болхлоша дӏахьор боккха, лоархӏаме болх ба тахан. Цох боккха пайда баьннилга гуш да вайна. Къизал ӏотоӏаяь, хьаькъал, къахетам котбалийтар мах баь варгвоацаш да. Вӏаший къинтӏерабаьле, эгӏазло дӏаяккха низ, иман хул наьха. Цу гӏулакхо хьагойт, комиссе ший болх боаггӏача боараме дӏахьолга», - белгалдир вай мехкадас Келаматанаькъан Махьмуд-ӏаьлас.
Республикан кулгалхочо хьоахадир, цу оагӏонцара болх дикка къахьегаш дӏахобахьа лерхӏилга. Цу гӏулакха оарцагӏбаьнна леларашта, эшаш дола гӏо деш хургба мехка хьалхалаттараш.
