«Локобаскет» яхача ишкола баскетбола яхьаш чакхъяьлар
Укх деношка, ГӏалгӀай Республикан спорта министра заместитель Султиганаькъан ТӀахӀир, ший гӀончаца Йовлой Исламаца, «Магас» спорта Цӏен кулгалхочунца Темарханаькъан Жамбулатаца совгӀаташ луш хилар «Локобаскет» яхача ишкола баскетбола лиге котбаьннарашта, яхаш, дийцар, «Сердало» газетага цигара бенача хоамо.
«Из деррига ловзар дӀахьош, спортсменаша дика къахьийгар, толам баккха гIерташ. ЙиӀигашта юкъе дикагӀа хилар «Наьсарен-Шахьара №1 йолча Гимназе» дешархой, шоллагӀа моттиг яьккхар «МагӀалбик-Шахьара №20 йолча юкъерча ишколо», кхоалагӀа моттиг «Тӏой-Юртарча №1 йолча юкъерча ишколо», - йоах хоамо.
КӀаьнкашта юкъе котбаьлар «МагӀалбикерча №3 йолча юкъерча ишкола» викалаш. Дото совгӀат даьккхар «Илдарха-Гӏалан №3 йолча юкъерча ишколо», кхоалагӀа моттиг «Наьсарен №15 йолча юкъерча ишколанна кхаьчар.
