ГӀалгӀай мехкара дешархо котъяьлар Ӏилма-тохкама кхетаче
Россе Турпалхочун Котанаькъан Ахьмада цӀерагӀча №12 йолча Инаркъерча ишкола дешархочун кхоллама проект «Даьхенцарча безамца садоахаш» яхача Ӏилма - тохкама конференце дикагӀчарех хилар, яхаш, дийцар «Сердало» газетага юкъарча дешара моттигерча завуча БӀарахой Зинас.
«Ший Ӏилман болх пхелагӀча классе ягӀача МургӀустанаькъан Рабияс гойтар, МагӀалбикерча Чахкенаькъан СаӀида цӀерагӀча Гимназе. Кхелахоша, цхьа барт болаш, лаьрхӀар; «Массайолча ханашка поэт» яхача проектах, къонача поэта Налганаькъан Илеза кхолламах хьалхара моттиг цунна яла, «Культурни тӀехьале» яхача даькъ тӀа.
Кхетаче дӀахьош, дешархочо къонача поэтах лаьца дувцарал совгӀа, гӀалгӀай меттала хозагӀа йола байташ йийшар, поэта байташта юкъера, - аьлар тхоца къамаьл даьчо.
Ше 12 шу даьнна мара еце а, цу йиӀига язъю байташ; цул совгӀа, цӀагӀа ший мукъа ха дӀахьош, тхан хӀамаш ювзаш къахьег цо, хӀаьта моттигерча культуран цӀагӀа истингаш де Ӏомалуш я из.
