ГӏалгӀайчен дешархо - литературах йолча Ерригроссийски олимпиадан толашагӀъярех цаӀ
ГӏалгӀайчен дешара, Ӏилман министра Цхьорой Ахьмад-Башира вӀашагӀкхетар хилар Магасерча дешархочунца Доценко Татьянайца, цо толашаг1йолча моттигех цаӀ яьккхар литературах дӀахьош хиннача Ерригроссийски олимпиаде. Из хоам «Сердало» газетага бир моттигерча дешара министерствон зарбан болх лелабераша.
Кхетаче йолаш, министра даькъалайийцар ГБОУ Магаса №1 йолча юкъерча ишкола дешархо, цунна делар совгӀат. Татьянас шийна хетар дийцар Пскове дӀайихьача яхьашка ше толам баккхарах.
«Хӏара толама тӀехьа латт даьй-ноаной, хьехархой боккха болх. Олимпиаде дакъа лоацаш хилар - из лоархӀаме къахьегам ба, цо дӀадех дика кхеташ хиларал совгӀа, ший гӀулакх дезаш а цунца бехктокхаме волаш а хилар», - аьлар министра.
Цо иштта баркал аьлар олимпиаде дакъа лаца дешархо кийчъяьрашта, шоай болх дика ховш, безаш уж хиларах, цо къаьстта белгалйир Татьянай хьехамча Горбакханаькъан ПаьтӀамат, цунна совгӀат делар, из дика кийчъярах.
