ГӏалгӀайчен дешархо Ерригроссийски преми хьежаеча берий тоабанна чувоагӀаш хургва
ГӏалгӀайчен Наьсарен кхален Тӏой-Юртарча №3 йолча ишколера Мерешканаькъан Ӏаддал-Рахьман «Кхетам балара керда философи» яха Ерригроссийски преми хьежаеча берий тоабанна чувоагӀаш хургва. Цу тароно цунна кхы а чӀоагӀагӀа новкъостал дергда ший новкъосташца цхьана, «Кхетам балара керда философи» яхача Ерригроссийски ӀӀӀ-ча преме дикагӀа бола дешархой хьехамчаш хоржача дакъа лаца.
«Преми хьежаеча берий тоабан доакъашхоша юкъедахьаш дола дакъа керттера да, «Кхетам балара керда философи» яха Ерригроссийски ӀӀӀ-гӀа преми яла берригача мехкара дикагӀа бола хьехархой, юкъарлон болхлой, шоашкара цу даькъ тӀа доккха дакъа юкъедена нах хьахоржача. Оаха даькъалавувц Мерешканаькъан Ӏаддал-Рахьман яхьан тӀеххьарча даькъ тӀа из кхачарца, вайна из гургва преми дӀахьоча хана», - аьлар «Сердало» газетага ГӏалгӀайчен дешара, Ӏилман Министерстве.
Ӏаддал-Рахьмана ше йоах, цу берий тоабанца ше харжарах, боарам боацаш гӀадвахав: «Со чӀоагӀа раьза ва цу преме ГӏалгӀайче гойта. Из лоархӀаме а бехктокхаме а да, бакъда со кийча ва сайгара цу юкъе вай культуран безам нахаца бекъаш дакъа лаца, дешар тоадара керда наькъаш лаха».
