Оалкамерча дешархошта хьалхадаьккхар, культуран тӀехьале лорае езилга
09.01.2025 16:28
ЖӀайрахьа-Ахабоарзен паччахьалкхен историко-архитектурни, Ӏалама музея- заповедника болхлоша даим дешархошца кхетаченаш ю, цар дувц царна культурни тӀехьален объекташ лорае езаш хиларах.
Цу тайпара аргӀанара къамаьл хилар Хамхой ХӀарона лоаман Оалкамарча ишкола дешархошца. Ара хьаяьча музее дийцар, тахан вай деношка хьакхаьча бӀаьшерен тӀехьаленаш мел лоархӀаме я, царга гӀолла вай даьй хиннача вахарах бола хоам вайга кхоачаш хилар. Цар хьагойт вай къаман истори, культура. Цудухьа ноахалгара ноахалга долаш, из дӀадахьа дезаш да, лора а деш.
