Гӏалгӏайчен дешархошта дувц, Ленинград лораеш хиннача мехкахой деналах
Гӏалгӏай къам мехкахдаккхара дагалоаттама Мемориальни комплекса болхлой дӏахо дӏахьош ба Сийлахь-боккхача Даьймехка тӏем тӏа котало йоаккхаш денал, майрал гойташ цига тӏема духьаллаьттача гӏалгӏай цӏераш йовзийташ, дӏа-юха ухаш лекцеш ешаш бола болх. Аргӏанара кхетаче хилар Магас-Шахьара лицее. Цига дакъа лоацаш бар 10-ча класса дешархой. Лекце тема яр - «Гӏалгӏайчен сий дола къонгаш-Ленинград лораяьраш» яхаш, цо тӏахьех кагирхой Сийлахь-боккхача Даьймехка тӏем тӏа гӏалгӏай къамо юкъедена дакъа диц ца дара, юкъарча исторен оагӏонаш йовзара.
«Ленинград лораеш лаьтта тӏом эггара унзаргӏа а, цунца цхьана тӏема истори, турпала оагӏонаш йолаш а хилар. Из тӏом лаьттар, 1941 шера тов бетта 8-ча дийнахьа денз наджгоанцхой бетта 27-ча денга кхаччалца. Уж дар 872 денала, турпала денош. Из шахьар моастагӏчунга дӏацакхачийтарах, Котало яьккхар цу тӏем тӏа. Ленинград лораеча дакъа лоацаш хиннарех ба Гӏалгӏайчен къонгаш а. Вай къаман бӏаь саг совгӏа хиннав Нева тӏара шахьар лораеш, тайп-тайпарча тӏема даькъ тӏа латаш», - аьлар «Сердало» газетага Гӏалгӏайчен МКЖР.
Мемориала комплекса болхлоша архивни материалаш, каьхаташ юкъедаьхар, дешархошта гойтаргдолаш, Ленинград йоаккхаш вай къаман бӏухошта карагӏдаьннар.
Из болх вӏашагӏбеллараша яхачох, цу тайпара кхетаченаш дӏахьош хиларо таро лу, кагирхошта кхетам балара болх дикагӏа тоабе. Царна дагалаттаргда исторически оагӏонца дувзаденнар, даьшта карагӏдаьннар, дешархоша а доаккхал дергда шоай Даьхе бахьан долаш турпалал гойта хиларах.
