Интернет йоаца дунен халкъашта юкъера Ди дездеш хилар вай дешархой
27.01.2025 09:20
2001-ча шера денз, Ӏан шоллагӀча бетта 26-ча дийнахьа дездеш дола дунен халкъашта юкъера интернет йоаца ди хьаллоацаш кхетаче дӀайихьар Наьсарерча № 15 йолча ишкола дешархоша. Из хоам «Сердалога» бир цу моттигера.
«Ишкола кулгалхочун гӀонча йолча Кхоартой Фатимас хьалхадаьккха, интернета меттел кхыдола пайда хьабоала хӀамаш юкъедоаладир бераша. Телефонаш, планшеташ юстартетта , кхетам лакхбеш, уйла яйташ дола ловзараш хержар цар. ЖӀакех ловзаш, «Уно» яха ловзар юкъедоаладеш, хоза дӀайихьар цар ха», - дийцар тха газетага.
Берашца къамаьл деш, хьехархоша теркалдир тахан интернете даьржа долча тайп-тайпарча зуламашка, воча сайташка уж мишта хьеж, малагӀа духьале лоаттаю.
