«Крокусе» хиннача хатара юкъе нийсбеннарашца, цар гӀайгӀа екъаш ба вай мехкахой
«Крокус Сити Холл» яхача моттиге воча наха доаржадаьча зулама юкъе нийсбеннарашца, цар дегашкара гӀайгӀа, бала бекъаш; кхетаченаш дӀайихьар республикерча ишколашка. Вай кхувш латтача тӀехьенна чӀоагӀа Ӏоткъам баьб цу унзарча хатаро.
«Зуламхоша оттадаьча туржаӀа юкъе байнаб, лозабаьб цхьаккха бехк боаца нах. Гаргара нах цига байнарашта сатоха низ тоъалба, лозабаьрашта моаршал хилда. Вай берригача боккхача мехка тӀабена бала ба из, Россе мел долча адамга кхаьча сагото я из!» - аьлар дешареи Ӏилмани гӀулакхах йолча министерствонна кулгал деча Боканаькъан Аьсета.
Укх бетта 22-ча дийнахьа Красногорске концерте баьхкача наха дов дир зуламхоша. Цхьаккха бехк боацача наха герз детташ, гӀишлох цӀи теха, доккха Ӏазап тӀаоттадир цар.
Массайолча Россе моттигашка санна, вай мехка а дӀайихьар из гӀайгӀа екъаш, лозабаьрий оагӀув хьаллоацаш йола кхетаченаш.
