ГӀалгӀайчен дешархоша дувцаргда шоай мехках, Россе къамий Ӏадаташ а довзаргда
Дика вӀашагӀъелла «Культуран шоатта ди. Мехктохкам» яха ерригроссийски хӀара шера дӀахьош бола болам хиларах, ГӀалгӀайчен дешархой таро хургья шоай хьамсарча мехках дувца, иштта вай боккхача мехка дахача къамий Ӏадаташ довза, яхаш, дийцар ГӀалгӀай Республикан дешара, Ӏилман Министерстве.
«КӀимарса бетта 7-ча дийнахьа, «Дешархошта лаьрхӀа культура» яхача боахамашта юкъерча культурно-дешара проекта чубоагӀаш, дӀаболалуш ба хӀара шера дӀахьош бола «Культуран шоатта ди. Мехктохкам» яха болам», - аьлар хоамо.
Цу дикача гӀулакха керттердар да-кхувшйоагӀача тӀехьенна юкъе Россе халкъий Ӏадаташ дӀадовзийтар. Статс-секретара - РФ культуран Министра гӀончас Алексеева Жаннас болам дӀахьош ба укх пхе шера вӀаштта, дӀаяхача ханашка цо гулвир 60 эзар доакъашхо.
«Боламе дакъа лацар - из дика таро я ший мехка дӀадахар довза безам болчоа», - аьлар министра гӀончас.
Российски Федераце хӀара моттигера дешархой таро йолаш ба мехктохкама, халкъа культуран доакъош тӀа шоашта ховш дар гойта, кхоллама диъ даькъах латтача яхьашка дакъа лоацаш: «Со экскурси лелаеш ва», «Хьамсарча мехка культуран наькъаш», «Аз язду хьамсарча мехках», «Са мехка Ӏадаташ». Цига дакъа лацара, кӀимарса бетта 7-ча дийнахьа денз маьцхали бетта 25-ча денга кхаччалца, дехар чудала деза «Культурадляшкольников.РФ» яхача портала доалахьарча кабинете.
Еррига хьаяйта материалаш яьйзачул тӀехьагӀа, кхелахой тоабо, цу юкъе мехктохкама, литература, халкъа кхоллама доакъошкара викалаш а болаш, хьакъоастабергба цхьа бӀаь дикагӀа бола болх, царна кепа тохаргья «Культурадлашкольников».РФ» портала тӀа.
Белгалдаккха деза, дика а пайдана а йола проект «Дешархошта йола культура» вахара юкъейоаккхаш я Россе культуран Министерствос, Россе дешара Министерствос, культураш дегӀайоалаяра, проекта урхаллен (РОСКУЛЬТПРОЕКТ) Центро, Россе культуран ганзо цхьана.
