Дешархоша кхетаче дӀайихьар, ца вовзача салтечун Денна хетаяь
ГӏалгӀайчен юкъарча дешара моттигий дешархоша, «Сий хилда хьа, ца вовза салте» яха кхетаче дӀайихьар, из хетаяь яр ца вовзача салтечун Денна, яхаш, дийцар «Сердало» газетага из болх вӀашагӀбеллараша.
«Тахан берригача мехка гӀолла дикача дешашца дагабох советски бӀухой, цар цӀераш ца йовзаш йисар, уж байначул тӀехьагӀа.
Цу кхетаченна чудоагӀаш, ГӏалгӀайчен дешархоша Ӏомаду дагалоаттама денош, сий ду денал долаш моастагӀчоа духьалъэтта бейнача салтий. Салтий деналах дувцаш, Илдарха-Гӏалан №3 йолча юкъерча ишкола дешархоша белгалдир, Росси массайолча хана цӀихеза хиннай, ший майрача салташца, иштта тешамеча эскарашца», - аьлар тха газетага.
Бераша дӀайихьа кхетаче дукхагӀча даькъе хетаяь яр Сийлахь-боккхача Даьймехка тӀема бӀухошта, вежарий кашамашка дӀабехка боахкача салташта. Уж тахан а бовзаш боаца Даьхен бӀухой ба.
