Къаман турпалхошкара масал эцаш, кхувш ба дешархой
«Даьхе лораяр яхаш болх ба вайна» яха кхетаче дӀахьош, Магасерча дешара Центр оалача моттиге истола гонахьа къамаьл дир Росгварде, МВД болхлоша, шахьара администраце викалаша. Цу моттиге дешаш барашта дийцар къаман цӀихезача турпалхой вахара наькъех, къаман сий доаккхаш лаьттача къонгех.
«Кхувш боагӀарашта Даьхен хьалхашкара шоай декхараш дӀадовзийта а; мохк лорабар, шийна тӀадилла гӀулакх дизза, деналца чакхдаккхар мел лоархӀаме да дӀахайта а вӀашагӀъеллаяр из кхетаче. Боккхача тӀема юкъе къаман сий доаккхаш лаьттача бӀухоех, Донбасерча тӀема операцен юкъе мохк лорабеш, денал долаш латтача къонгех, дийцар кагирхошта», - яхаш, хоам бу «Сердало» газетага шахьара мэре болхлоша.
Хьалкхувш латтача тӀехьенна йовза еза боккхагӀа болча къаман турпалхой цӀераш, цар вахара наькъаш. Даьхе еза, цун сий де Ӏомабергба уж цу гӀулакхо. Вай къаман дукха ба, тӀехьа тӀакхувш латтарашта хоза масал хила мегаргдола сийдола къонгаш.
