Вахар хаьдача бӀухой цӀераш йицъяц вай дешархоша
Шоашта тӀадаьхка декхараш кхоачашдеш, вахар хаьдача къаман сийдолча къонгий цӀераш дагалоаттаю республикерча дешархоша. Царна хетаяьча кхетаче дакъа лоацаш хилар бераш укх деношка. «Сердало» газетага из хоам бир тӀема операцен доакъашхой оагӀув хьаллоацаш йолча ганзо.
«№ 3718 йолча тӀема даькъе дӀайихьача дагалоаттама сайрен юкъе дакъа лоацаш бар МВД болхлой, байнача бӀухой гаргарбараш, новкъостий. Деналца, майралца Даьхен гӀулакх лорадеш лаьттача къаман яхь йолча къонгаша хьабена никъ бовзийтар дешархоша», - йоах тхога бенача хоамо.
«Даьхен лорбой» яхача ганза моттигерча филиала кулгал деча Оздой Муслима белгалдир, тӀема операцен юкъе вахар хаьдача бӀухой цӀерах урамаш хьакхоллаш, ишколашка Турпала Парташ хьаеллаш, шахьарерча, юртарча моттигашка уж бовзийташ, доккхий сурташ хьалъохкаш болх дӀахьоргба, аьнна. Цар цӀерах дӀакхухьаргья чемпионаташ, спорта яхьаш, иштта кхыйола йоккха кхетаченаш. Цар цӀераш дагалоаттаяр вай массане декхар да!
