«РОББО Фест 2025» фестивале, шоай говзал гойташ хилар Магасера дешархой
«РОББО Фест 2025» яхача робототехнически къамашта юкъерча фестивала кхоллама проектех йолча яхьашка шоай говзал, кхетама хьал гойташ хилар «Кванториум» яхача берий технопарка дешархой. Из хоам «Сердалога» бир цу моттигера.
«Программироване» оагӀонца мультфильм яхача къоастамах «Взлёт ракеты» RobboJR, «Игра или викторина» RobboScratch проекташ кхолла езаш дар бераш. «Программировани РОББО» яхача оагӀоно лаборатореца, робоплатформаца, иштта кхыдарашца болх байт берашка.
«Кванториумера» вай бераш дикка белгалдаьлар шин оагӀонца. Кхоартой Мухьаммада, Сурхой Абукара яьккхар котало, шоллагӀча моттиге эттар Йовлой Билал, кхоалагӀа моттиг Янданаькъан Ӏаьланна, Адиляйна кхаьчар.
«Котало яккхарца даькъала дувц аз вай бераш, цар хьехархой! Технологи, инженери оагӀонца дӀахо а иштта хьинаре къахьегаш, керда толамаш доахаш дӀабаха аьттув хилба вай берий», - аьлар технопарка клгалдеча Янданаькъан Салмана.
