«АртПром» фестивале дакъа лоацаш ба Наьсарера дешархой
«АртПром» яхача таханарча технологех йолча моттигерча фестивале дакъа лоацаш хилар Наьсарерча исбахьален оагӏонцарча ишколера бераш, иштта цун филиал лоархӏаш йолча таханарча кердадарий Ишкола доакъашхой.
«Кхоллам - промышленноста, промышленность - кхоллама» яхача хьалхаленца дӏахьош яр къамашта юкъера из фестиваль. «Хьехархоша хьалхале лоацаш, «ИзоПром», «ДизайнПром», «АудиоПром» яха проекташ яйзар берашта. Сурташка, видеошка, иштта тайп-тайпарча кхыдарашка гӏолла шоай начӏал гойташ хилар бераш.
«АртПром» яхача фестивалага гӏолла шоай начӏал гойта, кхоллама, промышленноста юкъера бувзам белгалбе аьттув ба къонабарий. Кердача технологешка, дизайнага, видеороликашка гӏолла боккха болх дӏахьош къахьегаш хиннача вай берашта бӏарахьежача дега боккха тоам хулар.
Массайолча оагӏонашкара шоай говзал гойта ловш бар къонабараш», - дийцар «Сердалога» Наьсарерча исбахьален ишкола кулгал деча Мержой Ладифас. Иштта йолча фестивале дакъа лацар берашта боккха аьттув луш да. Шоашта ховш дар массанена дӏагойта йиш хиларах чӏоагӏа раьза болаш, балхах чуийна кхестар уж.
Кхоллама, технологей оагӏонашцара шоай начӏал дикка сомадоаккхаш дар бераш. Белгалде деза, къонабарий вахаре иштта йола кхетаченаш лоархӏаме, цар дегаш ураувттадеш йолга.
