ИВЛ аппарат эца 75 эзар сом совгIа ахча гулдир Эбарга-Юртарча дешархоша
Берий реанимацена эшаш йола ИВЛ – пехкашта садаха гIо деш йола аппарат - эца 75 эзар сом ахча гулдир Эбарга-Юртарча дешархоша. Из хоам «Сердалога» бир «Дикача наьха клуб» яхача гIо лоаттадеча ганза болхлочо Гиренаькъан Лейлас.
Ер иттлагIа шу да, ганзо хьаллоацаш, «Дикалла ярмарка» дIакхухьаш, могаш боацарашта гIо де хьожаш дешархоша къахьега. Укх шера шоаш хьаяь хIамаш, даараш дохкаш болх дIабихьар цар. 74 567 эзар сом совгIа ахча гулде аьттув баьлар берий, Даьла къахетамца.
«АДАБ» яхача гIо лоаттадеча ганзе дIахьожадир ахча. ИВЛ аппарат реанимацена эггара чIоагIа эшаш бола гIирс ба, дукха унахой хул цун гIо эшаш.
«Оаха доккха баркал оал даьшта, ноаношта бераш иштта къахьетаме, догдика долаш кхедарах, иштта цар леладер хьаллоацаш, царна нийсагIа хургдар хьалхадоахаш латтача хьехархошта. Хоза масал да оаш хьахьекхар! Тахан бераша хьагойтад, цIена, къахетаме, дика дог хилар вахаре мел лоархIаме да», - аьлар Дикача наьха клуба кулгал деча Матенаькъан Натас.
