Долакха-Юртарча дешархошта бовзийтар, Пхьиленаькъан Хьусена кхоллам
Долакха-Юртарча культуран ЦӏагӀа, «Дешархошта - культура» яхача Ерригроссийски проекта чуйоагӀаш, тематически сайре хилар. Из хетаяьяр, вовзаш волча гӀалгӀай журналиста, литератора Пхьиленаькъан Хьусена. Кхетаче дӀахьош яр культуран-салоӀама моттига кулгалхо Манкенаькъан Зина. Цига гулбелар моттигерча ишкола дешархой, цар хьехамчаш, иштта юртарча библиотекан болхлой.
«Литературан сайре безаме хилар, дукха къаман дешаш довзийтар, берий таро хилар цун кхолламга гӀолла ханашцара, культурацара къаман Ӏадатий бувзам бовза. Дешархоша, Пхьиленаькъан Хьусен журналист хиларах тарра, цо беш болча балхах лаьца доклад кийчйир. Сайрен шоллагӀа дакъа хетадаь дар поэтически дешара. Дешархоша йийшар Хьажбикара Хьусена байташ, ма ярра цар кӀоаргал гойта хьожаш.
Царга гӀолла сомаяьккхар хьамсарча мехка хозал, цун сурт, иштта йовзийтар къаман вахара оагӀонаш. Укхаза иштта дийцар Пхьиленаькъан Хьусена «Хьаьнала хьоцар» яха дувцар, цу тӀа дувц цӀенача къахьегамца, даьшта а тӀехьенна а хьалхашка сий лорадеш, вахарах», - аьлар «Сердало» газетага Манкенаькъан Зинас.
Пхьиленаькъан Хьусен ГӏалгӀайчен культуран сий дола болхло ва, иштта цун еннай «За заслуги» яха орден. Тайп-тайпарча шерашка цо болх баьб Нохч-ГӏалгӀай радион дикторалла, ГТРК «ГӏалгӀайче» корреспонденталла, из болх беш хиннав «Сердало», «Заманхо» яхача газеташка. Карарча хана из ва «ГӏалгӀайче» яхача газета хьалхалатта болхло.
Поэта, прозаика кхоллам арабаьлар кепа теха «Сердало» газета тӀа, альманаха «Лоаман Ӏуйре» альманаха тӏа, «Маьтлоам», «Литературни ГӏалгӀайче», «Къамий вахар» яхача журналаш тӀа. Цун хьалхарча литературе даьча балхашта дика мах оттабир цӀихезача говзанчаша Пхьиленаькъан Махьмад-СаӀида, Дахкилганаькъан ИбрахӀима, Вешкаранаькъан Мухьмада.
