Дешархой Iомабу экстремистий тоабаш вIашагIъетта нах бовза
Дабе-Юртарча №14 йолча ишколе хьехама болх дIабихьар, из лаьрхIа бар; экстремизма, терроризма хьал кагирхошта юкъедаргдоацаш; из юха тохара а кхувш йоагIача вай тIехьенна кхетам балара а, уж нийсача наькъ тIа хургболаш, царна таханара лоархIамедараш дикагIа довзаргдолаш. Царца къамаьл дIахьош дакъа лоацаш хилар МагIалбика кхален nерроризма духьала къовсам лоаттабара йолча комиссе Iалашон отдела кулгалхо Джамболатанаькъан Мухьмад, иштта дина викалаш Джанхотанаькъан Гирихан, Беканаькъан Акромат, Дабе-Юрта кулгалхочун гIонча Къоастой Башир.
«Из къамаьл дIахьош боккхагIбараша берашта дийцар эхь-эздел долаш, харцахьара хIамаш хьа ца ийдеш, зулама тIехьа боацаш, лоалахошцара дин гIулакхаш лорадеш уж хила безарах. ЙоккхагIа йолча класса дешархошта дика хьалхадаьккхар, во никъ хьаэцараша шоашта а шоай гаргарча наха а малагIа зе ду. Къамаьлага ладувгIаш хиннарашта дийцар экстремистки тоабаш мишта хул, шоай тоабах нах хьатохара цар малагIа хьалаш леладу, из кхерам мишта юхатоха беза», - аьлар «Сердало» газетага МагIалбика кхален администраце.
Тхога хоам баьчо яхачох, цу тайпара кхетаченаш дIахьу МагIалбика кхален дешара моттигашка каст-каста. Цар маIан да, кхувш йоагIача тIехьенна кхетам балар, юкъарлон кхерамзле лораяр, уж шоай харцахьарча гIулакхех бехктокхаме хилар царна довзийтар.
