ТӀой-Юртара дешархой таро хилар кикбоксинга къайленаш йовза
Даьхен лорбой Шу ер хилар белгалдеш, мехка дӀахьош я «Россе низ» яха спортивни марафон. Цига дика дакъа лоацаш я вай республика а. Дукхача моттигашка дӀахьош я говзанч-классаш, йийлла тренировкаш, турнираш, истола тӀарча ловзарах, спорта дисциплинех йола яхьаш.
Цу юкъе дакъа лоацаш я Наьсарен кхален ТӀой-Юртара №2 йола юкъера ишкол. Укх деношка цига дӀайихьар спортивни говзанч-класс кикбоксинга латарах, из дӀахьош хиннараш бар дика бовзаш бола хьехамчаш: цӀихеза Россе тренер, боксах спорта мастер, республикан гулъяьча тоабан воккхагӀа вола тренер, ГСВГ чемпион ( Германе-советски эскара тоабаш) (1984 ш.) лакха дозал дола Хоаной Борис; дуненна диазза чемпион, Европа чемпион, дуненна Кубок яьккха, хӀанз ГӀалгӀай Республикан кикбоксинга Федераце президент вола Коазой Мовсар, 2004-2008 шерашка Россе цӀихеза тренер. Россе кикбоксинга Федераце вице- президент, 2004 шера денз, ФКР президиума доакъашхо Борзанаькъан Бахьаудин.
Кхетаче дакъа лоацаш хилар «Бералла наькъаш» яхача вай республикан проекта тӀахьожаш вола Колой СаӀид, проекта даькъ тӀара болх лелабу ГӀоандалой Аьсет.
«Сердало» газетага, «Бералла наькъаш» яхача проекта зарбан болх лелабераша ма аллара, берашта дайзар кикбоксинга гӀулакх.
«Тхо тешаш да, цу тайпара дӀахьош йолча кхетаченаша бераш физически дегӀадоаладара дика дакъа дӀалоацаш хиларах, кагирхошта юкъера бувзам чӀоагӀбарах», - аьлар из болх вӀашагӀбеллараша.
