Малсаганаькъан Кураза Фатимай кхоллама наькъах дийцар Дола-Коарча дешархошта
«Дешархошта лаьрхӏа культура» яхача культуран-дешара проектага гӏолла, Малсаганаькъан Кураза Фатимай 125 шу дизара хетаяь кхетаче дӏаяхьа гулбелар Дола-Коарча культуран Цӏагӏа. Из хиннай вай къаман эггара хьалхара байтанча-кхалсаг, иштта гӏалгӏай хьалхара актриса.
«Бӏаьхий хиннаб Малсаганаькъан Фатимай кхоллам, вахара никъ. Гӏалгӏай къаман литературе йизза моттиг дӏалаьцарех хиннай байтанча. Йоккха программа яр цун вахарах дувцаш кийчъяьр. Бохтаранаькъан Иманас ше ма барра бовзийтар къаман цӏихезача йиӏий вахара никъ.
Белгалде деза, Малсаганаькъан Кураза Фатима вай литература оттача наькъ тӏа лоархӏаме, белгала лар йита саг йолга. Къаман кхоане дагайоаллаш, Даьхенах дог лазаш, къахьийгарех я из ала йиш я цох тахан майрра», - дийцар «Сердалога» культуран Цӏенна кулгал деча Алероевгӏар Билала.
Малсаганаькъан Фатимай байташ ешаш хилар бераш кхетаче гӏалгӏай а эрсий а меттала. Гӏалгӏай къаман йизза йоӏ йолаш яьхача байтанчан хӏара мугӏ Даьхенцара безам бувцаш, ший хӏама хестадеш ба.
Иштта цига оттадир Кураза Фатимай байтах яздаь «Котдаьлар вай» яха илли. Цига хьокха оттадаьдар гӏалгӏай эггара хьалхарча байтанчан, актрисай кхоллама никъ бовзийташ дола книжкаш.
