ЦӀайга хувцамаш даьд МагӀалбикерча дагалоаттама, сийлен сквере
30.04.2025 13:11
Фашист вохаваь, вай лаьтташ тӀара аравоаккхаш яьккхача Коталон 80 шу дизар хьатӀадоагӀаш, дукха хувцамаш деш латт тӀема сийлен шахьар йолча МагӀалбике.
Карарча хана, хоза лостам беш, кулг тохаш, куц хувцаш латт цигарча сквера. Из хоам «Сердалога» бир шахьара мэре. Сквера доазув цӀендеш, сийленгаш меттадоаладеш, зизаш дӀадогӀаш, лампаш хувцаш къахьегаш боахк болхлой. Шахьара кулгал деча Галай Мусас тӀадилла, сквера гонахьарча карта тӀара басар Ӏодаьккха, бос хозагӀа, сийрдагӀа хилийта кердадар хьекхад.
ТӀема операцен доакъашхой цӀераш тӀайола «Дагалоаттама пен» урагӀхьош латт сквера юкъе. Доккхача исторен чухь баха бисача, деналца, майралца шоай декхараш токхаш чакхбаьннарий цӀераш йовзийтара тӀехьа дӀахьош болх ба из.
