Юкъерча Ачалкхерча дешархошца кхерамзленах, машарах дийцар
Юкъерча Ачалкхерча № 15 йолча ишкола йоккхагIча классашкарча дешархошца, кхетаче дIайихьар укх деношка. Къонабарашта дийцар терроризм, экстремизм яхача зуламех, цар адамий вахар мел чIоагIа дохаду. Кхетаче дакъа лоацаш бар МагIалбика кхален АТК оагIонцара кулгалхо Джамболатанаькъан Мухьмад, дийша нах, Iаьдала болхлой.
Гулбеннараша кхувш латтарашта дийцар; цу воча, бIехача зуламах хьокхавенна саг, ший вахар доадаь саг волга. Адамашта юкъе массахана барт, машар, цхьоагIо хила езилга, цхьаккха а тайпара кхерам боаржабе йиш йоацилга»,-дийцар «Сердалога» МагIалбика кхален администраце.
Кагирхошта хьалхадаьккхар, тахан интернете гIолла шоай бIеха болх дIакхухьача цу нахаца цхьаккха тайпара бувзаме вала, цар яхачунга ладувгIа йиш йоацилга.
Нагахьа, цхьа тешаме доацаш хIама зийнадале, ма хулла сихагIа Iаьдалга хоам бе а беза.
Белгалде деза, иштта йола кхетачеш МагIалбика кхале массахана дIакхухьаш йолга. Тахан лоархIаме, кагирхошта пайда хулаш болх ба из.
