ГӏалгӀайчен ИЗО Паччахьалкхен музея болхлошта, салаӀара керда таронаш йийцар
ГӏалгӀайчен исбахьален искусствон Паччахьалкхен музее кхетаче хилар культуран юкъарлон викалца «Bella Tour» яхача туристически компане менеджер йолча Тиймарзанаькъан Хьавайца, цо гойтар туристически оагӀон шера программа, эггара чӀоагӀагӀа болча туристий хьашташ кхоачашде йиш йола балха дакъа. Керттера терко тӀаяхийтар тоаба салоӀам вӀашагӀболлара лаьрхӀача таронашта, из геттара лоархӀаме дар тоабашца цхьана дӀахьоча салаӀара, иштта корпоративни кхетаченаш дӀаяхьара.
«Тиймарзанаькъан Хьавас дийцар, салоӀама ха дӀаяхьара йолча тайп-тайпарча оагӀонех. Къилбаседа Кавказа хозагӀа йолча моттигашка, Россе кхыйолча миӏингашка, доазол арахьа а вахара, салаӀара йола таронаш йийцар. Тахан латтача хана дукха къахьегам а тайп-тайпара чоалхане вахара хьалаш а нийслуча хана, лоархӀаме да дегӀага салаӀийтар, ший дукхача уйлаех паргӀатавалар, цудухьа цу тайпарча хьалашка кӏаьдбеннача наха дӀадехараш кхоачашдара вӀашагӀбеллаб тахан туристически оагӀон болх, цо таро лу низ чубайта, юха наха юкъе балха аравала», - аьлар «Сердало» газетага ИЗО Паччахьалкхен музея зарбан болх лелабераша.
Цхьана вӀашагӀкхийтта дӀахьош йола салоӀа ха - из лорахӀаме да къахьегама тоабашта цхьана хилара, цо хьакхолл чӀоагӀа корпаративни культура, юкъера гӀулакхаш чӀоагӀду, шоайла тешаме хилара болча наькъ тӀа боах, цул тӀехьагӀа из балха дикача оагӏорахьа ӏаткъ.
