ИЗО паччахьалкхен музея хьаллаьцар, шоай Белгородера балха новкъостий
ГӀалгӀайчен исбахьален искусствай паччахьалкхен музея, Белгородера шоай балха новкъостий, иштта беррига Белгорода бахархой телеграм-канале гӀолла хьаллаьцар «Белгород хьалха латташ» яхача иллеца. Цу иллена дешаш яздаьд Россе журналистий Союза Старооскольский отделене кулгалхочо Ташманова Евгенияс, из дӀаоалараш ба Белгорода бахархой. Кастта дездергдолча ГӀалгӀайчен 100 шу дизара денна хетадаь, Белгорода паччахьалкхен халкъа культуран музее дӀабахьа безаш бар ГӀалгӀайчен музея болхлоша кийчбаь гойтам. Бакъда Украинерча моастагӀаша Белгороде бахача маьршача наха террористически хьал оттадаь хиларах, из тӀехьагӀа хургба.
«Оаха бувзам лелабу тхоай балха новкъостаца Абраменко Татьянайца, тешаш а да кастлуш уж унзара хоамаш юхадаргда, аьнна. ГӀалгӀай халкъа дика ховш да Белгорода бахархошкара хьал. Массаза санна, тахан гӀалгӀай бӀухой цу тӀема хьалхарча мугӀарашка латташ, моастагӀчоа духьалъэтта, СВО дакъа лоацаш ба, шоай са ца кходеш. Искусство, культура политиканна юкъейоагӀаш яц. Цо новкъостал ду кхоаненга сатувса. Вай мехка а дерригача дунен тӀа а машар отталба! Сатоха низ лулба вайна! Дала новкъостал дергда дикача наха!» - аьлар «Сердало» газетага ГӀалгӀайчен паччахьалкхен исбахьален искусствай музея директора, республике цӀихезача болхлочо ТӀумхой Любас.
Белгороде, Паччахьалкхен ИЗО музея гойтам дӀа а хьоргба, цу денал долча шахьара бахархой культурни вахаре дика оагӀув хинна бусарг а ба из. Вай боккха мохк ший бахархой кӀалхарбаха низ дӀакхоачаш ба, кхерамзленна Ӏалашо а ергья. Россена тӀабена тийшаболх, доаггӀаш дола жоп доацаш бутаргбац, цо бохабергба беррига унзара гӀоз.
