Россе Почтан республикера болхлой толашагӀбарашта юкъе ба
Ахкан шоллагӀча беттарча шоллагӀча кӀирандийнахьа хӀара шера, Россе почтан Ди дезду берригача мехка. Цу денна хетаяь кхетаче вӀашагӀъеллар «Россе Почта» яхача АО кулгал деча Волков Михаила. «Сердалога» из хоам бир УФПС зарбан болх лелабераша. Укх бетта 9-ча дийнахьа Москве дӀайихьар лоархӀаме кхетаче. Шоай балха тӀа толамаш даьхараш белгалбир цига, царна юкъе яр федеральни оагӀонца операционни балха доал деш волча кулгалхочун дикагӀа йола гӀонча яха цӀи енна Гаьгенаькъан Елена.
«Таьрахьашцарча экономиках йолча министерствос белгалйир из, дика болхло хиларах тарра. Таьрахьашца дувзаденнараш доаржадарах, бувзамах йолча министерствонна хьалхалаттача Шадаев Максута грамота елар цунна, бехктокхаме къахьегарах», - йоах тхога бенача хоамо.
Иштта белгалйир МагӀалбикерча почтамта кулгал деш йола Кхузанаькъан Малика. 2024-ча шерарча Россе почтамтай кулгалхошта юкъе толашагӀа йола болхло я аьнна теркалйир из. «Шийна тӀехьа латтача тоабанна кулгалде ховш, геттара хала ха эттача а болх лакхача боараме дӀахьош, ший гӀулакх дика довзаш, бехктокхаме къахьегамхо я, аьнна, тешал дир цунна», - дийцар тха газетага.
Россе бувзама болхлой профсоюза кулгал деча Назейкин Анатоле совгӀаташ делар шинна болхлочунна. Вай мехкара ши болхло йоккхача кхетаче иштта белгалъялар вайна массанена тоам беш гӀулакх да. Шоаш хьалаьцача моттиге боаггӀача боараме къахьегаш, шоай гӀулакх лоархӀаш, дезаш хилар, гонахьарча тоабан а уйла яр - уж дика болхло хилар да! Россе Почта болх хӀара денна тоабеш латтараш цу мугӀарера къахьегамхой ба.
