Гӏалгӏайчен Москверча массазарча викала болхлоша дакъа лаьцар, герга истол дӏахьош
И.М. Губкина цӏерагӏча (къаман тохкама университета) Российски паччахьалкхен мехкадаьттан, газа университета кулгалхоша бийха, Москверча Гӏалгӏайчен массазарча викала балха новкъостий дакъа лоацаш хилар, «Кагирхошта юкъе терроризма духьалара никъ хьакхоллара граждански культуран хьал» яхача кхетачене.
«Из хьайийллар халкъашта юкъера болх дӏабахьара волча Максименко Александра. Ше къамаьл деш, цо аьлар, университета керттера цхьа маӏант - Россе дукхача къамий барт чӏоагӏбар, кагирхошта юкъе ӏадатий мах бараш хьаллацар да. Проректора белгалдир, дешара даькъ тӏа даккха дезаш хилар, дукхагӏа къамаьл дӏадахьа, наьха сакхетам лакхбар, из дикагӏа кагирхошта довзийтар. Къамаьл деш дакъа лаьцар Россе итт моттигера баьхкача говзанчаша», - аьлар «Сердало» газетага вай викала фусаме.
Герга истол дӏадахьа баьхкараша дийцар; экстремизма, терроризма профилактика яра болх дӏахьош, дукхагӏа кагирхой юкъеоза безарах, иштта моттигашта юкъе шоайла цу даькъ тӏара балха говзал эцарах.
Къаьстта йола терко тӏаяхийтар университета балха. Тӏехьарча шин шера укхаза 200 совгӏа кхетаче дӏайихьай, къаьстта терроризма духьалаъоттара бола болх тоабеш. Царех дикагӏа накъадоалар каст-каста юкъедоаккхаш да терроризма духьалъоттара, цу балха нийса никъ хьехара.
