УПЧ волча моттиге, бахархой тӀаийбу ди дӀахьоргда
Бахархой тӀаийбу ди дӀахьоргда, укх бетта 4-ча дийнахьа, сага бокъонаш лораярах болча оагӀон хьалхалаттача ЦӀечой ИбрахӀимеи республика прокура гӀонча волча Воробьев Темуреи. Мехка дӀахьош болча балхо белгалъергья бахархошта Ӏаьдало луш йола цар еррига бокъонаш. Наха шоай бокъонаш дикагӀа дӀайовзийта дӀахьош кхетаче я из.
«Тешал деш дола каьхаташ хила деза хьатӀавоагӀача сагага. Шийна къувлаш дола хӀама ма дарра ӀотӀаяздаь каьхат хила деза цунга. Бахархой тӀаийбергба укх адресах: Магас, Малсаганаькъан Д. цӀерах бола урам, № 11. Телефонаш: 8( 963-172-42-70), 8 (8734-55-19-20). Ӏуйран 10 сахьат даьлча денз, делкъийна сахьат даллалца тӀаийбергба бахархой», - дийцар тха «Сердало» газетага.
Наьха бокъонаш телхаеш, лерхӀам беш доацача гӀлакхех дувцаргда цига. ХӀара лоткъам боаггӀача боараме, цу гӀулакха эшаш мел бола бехктокхаме бола нах юкъе а болаш тохкаргба. Ӏаьдало шоашта хьаенна бокъонаш лораеш, де дезараш хьалхадоахаргда бахархошта. Суданна, прокуратуранна, сага бокъонаш лораярах болча оагӀон болхлошта ший хӀама мишта тӀадахьа деза ховргда сага.
