Цу гӀулакха эшаш дола каьхаташ кийчдаьд, паччахьалкхен экспертизо могадаьд.

«Республике ФАПаш хьалъяра новкъостал ду, унахцӀенон хьалхарча аргӀагӀа деш дола новкъостал тоадара йолча программо, «УнахцӀено» яхача къаман проекта чудоагӀаш. Дукхача шерашка, 712 саг вахача Чамалха баха нах эсалча хьалашка шоай могашал тоае езаш хиннаб. ХӀанз цу лорий даькъ тӀа шоай керда таронаш йола гӀишло хургья.

Из хьалъеш хилар царна доккха совгӀат да, хьалха санна ха йоаеш лела безаргбац цар», - аьлар гӀишлон министра Иленаькъан М.

Цул совгӀа, лакхехьа белгалъяьча программанна чуйоагӀаш, ГӀалгӀайче хьалъе лаьрхӀад «60 моттига лаьрхӀа РДКБ ГБУЗ даькъ тӀа Инфекционни отделени». Иштта хьалъе йолаяьй Ӏаьлий-Юрта Наьсарен кхален дарбанче. Цигара балхаш дӀахьош хургда хьатӀадоагӀача шера а, хӀанз укх сахьате лардашта лаьрхӀа йола кӀийле чӀоагӀъеш я.

Из деррига а республикан унахцӀенон материально-технически оагӀув дикагӀа дегӀабоалабара деш да.