ГӀалгӀайчен оарцагӀъухараша квартира чу виса хинна Магаса вахархо араваьккхар
04.09.2025 16:50
Хоамаш тахкара цаӀ дола «Амал 112» кхаьчар тахан дийнахьа хоам, Заьзганаькъан И. цӀерагӀча проспектерча цхьан цӀагӀа, никъ хьаелла ца могаш, саг квартира чу виса хиларах.
«Цига сихонца кхаьчар лахара-кӀалхаваккхара йола «Аьрзи» яха тоаба. Кхоъ лакха говзал йола къахьегамхо дӀаволавелар шоай болх бе. Профессиональни говзал лелаеш, цар дӀакъовлаенна ниӀ сиха хьайийллар», - аьлар «Сердало» газетага ГӀалгӀайчен чоалханерча боахаме.
Наьха кхерамзле хилара хаттар керттера да мехка сихача амала болхлошта. «Аьрзи» яхача тоабан кӀалхарбоахачар балха говзал лакха йолга цӀаькха а гуш хилар эттача хьале, цар шоай ханнахьа чоалханеча хьалашка нийсбеннача республикан бахархошта новкъостал ду.
